ثقافة الفنان رشدي بلقاسمي يرد على مريم الدباغ ويقول: "لأول مرة في حياتي نعمل عملة و نندم عليها"
نشر في 20 فيفري 2018 (10:04)
عبر الفنان رشدي بلقاسمي عن استيائه اثر مشاركته في البرنامج التلفزي الذي تبثه قناة التاسعة مشيرا الى تعليق الكرونيكوز مريم الدباغ التي وصفت رقص بلقاسمي قائلة: "الشطيح هذا متاع قعار متاع الداخل مش متع تونس". ودوّن بلقاسمي ما يلي:
"لأول مرة في حياتي نعمل عملة و نندم عليها...
الليلة كنت ضيف l'émission (تسجيل) لأمين قارة و معاه مجموعة من الفنانين إلي نحبهم و نحترمهم برشا.
الضيف إلى قبلي جعفر القاسمي و الجو خفيف فيه برشا ضحك و زهو و طرب...
وقفت كيف العادة وريت خطوات من الرقص التونسي البدوي ( الحلة و الجربي)، و الأمور لتوا باهيه و عامل جو.
و لكن صدمت بتعليق أقل ما يقال عنه عنصري! تقوم وحدة عمري لاسمعت باسمها و لاريتها chroniqueuse يقولولها #مريم أش تقول : الشطيح هذا متاع قعار متاع الداخل مش متع تونس.... وكلام أخر تو تسمعوه كيف تتفرجوا في الحلقه و انشاء الله ماتتنحاش في montage.
الحاصيلوا أول حاجه قلتها لروحي خساره فنانين كبار كيما عبد الحميد قياس و عزيزة بالبيار... الي علقوا ببرشا حماس و غيره على الرقص الشعبي، قاعدين مع وحده كيما هذه على طاوله وحده...
و غريبه كيفاه قناه التاسعه تقبل انها تخدم ناس تغتصب فينا كل يوم بأفكارها العقيمه و تمرر سمومها و عقدها بضحكة و لعبة...
الحاصيلو ا يا جماعة بربي سامحوني ع التعاسة إلى باش تشوفوها نهار الاربعاء على قناه التاسعه؛ و الله لا عاد تتعاود!
وهذه أخر مرة نقبل نتضيف عند حد ما نعرفوش، باش لا يسمعني لكلام و لا يسب أسمى حاجه في حياتي #الرقص.
و السلام بالعافيه...
رشدي بلقاسمي"
